१४ भदौ, काठमाडौं । काठमाडौं महानगरपालिकाका मेयर बालेन शाहले आफ्नो चीन भ्रमण रद्द गरेका छन् ।
चीन सरकारले गरेको पर्यटन प्रवर्द्धन तथा संस्कृति आदानप्रदान निमन्त्रणाका लागि बिहीबार दिउँसो बालेनको बेइजिङतर्फ जाने तय भएको थियो ।
तर चीन सरकारले हालै आफ्नो नक्सा सार्वजनिक गर्दा नेपाली भूभाग भारततिर देखाएको र नेपालको नयाँ नक्सा अनुसारको भूभाग नदेखाएको भन्दै उनले चीन भ्रमण जान रद्द गरेका हुन् ।
‘नेपाली भूभागलाई चीनले नेपाललाई नै नसोधी भारतको देखाउनु हाम्रो संवेदनशीलता माथि गलत कदम चालेको मानेका छौं । त्यसैले आज मेरो चीनको निमन्त्रणामा हुँदै गरेको ५ दिने भ्रमण नजाने नैतिकताको आधारमा निर्णय गरेको छु’, सामाजिक सञ्जालमा बालेनले लेखेका छन् ।
नेपालले ७ जेठ, २०७७ मा लिपुलेक, लिम्पियाधुरा र कालापानीलाई समेटेर नेपालको नयाँ नक्सा संसदबाट पारित गरेको थियो ।
